Hindistan və Pakistanda meydana çıxan və insandan insana keçməklə sürətlə yayılan yeni viruslar bəşəriyyəti qorxuya salıb. «İhlashaber» agentliyinin Dehlidəki mənbələrə istinadən yaydığı xəbərdə deyilir ki, şərti olaraq NDM-1 adlandırılan yeni virus istənilən antibiotikə qarşı davamlıdır. Məşhur «Lancet» tibb jurnalında verilən mütəxəssis rəylərinə əsasən, hazırda insan bədənində hormonları sıradan çıxaran bu virusları məhv edəcək hər hansı dərman mövcud deyil, ona görə də alimlər təcili bu sahədə kəşflə məşğul olmalıdırlar. Mütəxəssislərin fikrincə, adıçəkilən virusları dünya dövlətlərinə Pakistan və Hindistana estetik əməliyyat olunmaq məqsədilə gedən adamlar yayırlar. Yəni əməliyyat əsnasında bu virusa yoluxurlar və vətənlərinə qayıtdıqdan sonra müxtəlif yollarla, özləri də bilmədən başqalarına yoluxdururlar. Məsələn, Böyük Britaniya Səhiyyə Nazirliyi artıq bu ölkədə 50 belə halın qeydə alındığını bildirib. Yeri gəlmişkən, ABŞ, Kanada, Avstraliya və Niderlandda da NDM-1 viruslarına yoluxma halları qeydə alınıb.
Alimlər bildirlər ki, NDM-1 virusları orqanizmdə «E.coli» və sair bakteriyaları da sanki özünə cəlb edərək tibb elminə məlum olan ən güclü antibiotiklərə qarşı davamlılıq nümayiş etdirir. Elə mütəxəssisləri ən çox narahat edən amil də məhz «NDM-1» viruslarının məhv edilməsi çətin olan digər bakteriyalarla birləşə bilməsidir. Ona görə də bu xəstəliyin Afrika və Asiyanın daha yoxsul ölkələrində yayılmaq təhlükəsinin böyük olduğunu nəzərə alan alimlər dünyada insan tələfatının miqyasının artacağını və hətta bu epidemiyanın qarşısıalınmaz hala gələ biləcəyini proqnozlaşdırlar.