“ÜST-nin qrip üzrə mütəxəssis olan bir neçə əməkdaşı “donuz qripi”nə qarşı peyvənd hazırlayan əczaçılıq şirkətlərindən qrant alıb”
Ümumdünya Səhiyyə Təşkilatı (ÜST) 2009-cu ilin mayında “donuz qripi” (AH1N1) epidemiyasının təhlükəlilik dərəcəsini həddən artıq şişirdib.
Lent.az-ın “The Guardian” qəzetinə istinadən verdiyi məlumata görə, bu, Avropa Şurasının hesabatında yer alıb.
Hesabat Avropa Şurasının Səhiyyə Komitəsinin sədr müavini, britaniyalı deputat Pol Flinn tərəfindən hazırlanıb. Hesabatda qeyd olunur ki, insanların ÜST-nin tövsiyələrinə inamlarını itirməsi gələcəkdə ciddi nəticələrə gətirib çıxara bilər.
Pol Flinn qəzetə açıqlamasında deyib ki, gələcəkdə hər hansı ciddi xəstəliklə bağlı epidemiya yaşanarsa. İnsanlar ÜST və digər qurumların peyvəndlənmə ilə bağlı tövsiyələrinə inanmaya və beləliklə də sağlamlıqlarını ciddi təhlükə altında qoya bilərlər.
Pol Flinn ÜST-nin idarəetmə sistemində şəffaflığın olmadığını da vurğulayıb: ÜST-nin qrip üzrə mütəxəssis olan bir neçə əməkdaşı “donuz qripi”nə qarşı qrip peyvəndlərini hazırlayan əczaçılıq şirkətlərindən əhəmiyyətli məbləğdə qrant alıb. Onların bu məsələdə neytrallığı sual altındadır. Hazırda ÜST donuz qripi ilə bağlı ehtimalını inandırıcı dəlillərlə əsaslandıra bilməz və bununla bağlı hər hansı sənəd də ortaya qoymayıb.
Qeyd edək ki, bu hesabat Avropa Şurası Parlament Assambleyasının tövsiyəsi ilə hazırlanıb. Səhiyyə Komitəsinin ilk yığıncağı bu ilin yanvarında keçirilib. Həmin iclasda avropalı ekspertlər və Səhiyyə Komitəsinin üzvləri ÜST-nin AH1N1 virusu ilə bağlı tövsiyələrini sərt tənqid edib və ÜST-nin əczaçılıq şirkətlərinin təzyiqi ilə belə addım atdığı barədə fikirlər səsləndiriblər. ÜST-nin bir sıra qərarları da elmi baxımdan sual altında qoyulub. Hesabatın yekun mətni bu il aprel ayında müzakirəyə çıxarılacaq.