ABŞ-ın Minnesot Universitetinin mütəxəssisləri çox maraqlı bir araşdırma aparıblar. Bu dəfə araşdırmanın əsas mahiyyəti pulla bağlıdır. Qeyd edək ki, nəticələr də gözlənilməz olub. Sən demə, pul banknotları və qəpikləri ibuprofen və aspirin kimi ağrıkəsici dərmanların əvəzində işlətmək mümkündür. Bir çox insan üzərində aparılan araşdırmalar zamanı bəlli olub ki, özlərini çox pis hiss edən şəxslər pul sayandan sonra ağrıları ilə bağlı özlərini daha az narahat hiss edirlər. Universitetin alimləri bu qəribə nəticəni çox sadə səbəblərlə izah ediblər. Onların sözlərinə görə, insanların pullara və qəpiklərə toxunması həmin şəxslərin özünü qiymətləndirmə və əminlik hisslərini gücləndirir. Bu halda isə ağrılar daha az hiss edilməyə başlayır. Təcrübə zamanı alimlər insanlardan 80 ədəd 100 dollar əskinasının bağlandığı banderolları, 80 ədəd isə adi kağız bağlamalarını saymağı tələb ediblər. Mütəxəssislər araşdırmalara qatılan şəxsləri məlumatsız qoymaq üçün bu qəribə təcrübənin əsas mahiyyətinin insanların əl hərəkətinin sürətini araşdırmaq bəhanəsini uydurublar. Daha sonra isə iştirakçıların hər birinin əllərini qaynar su ilə dolu qaba salıblar. Məlum olub ki, pul banknotlarını sayan şəxslər daha az ağrı hiss edir və əllərini qaynar suda daha çox saxlaya biliblər. Kağızları sayanlar isə əllərini dərhal qaynar sudan çıxarıblar.

Qeyd edək ki, ağrıları unudan əsas vasitələrdən biri tək pul deyil. Keçən ilin noyabrında Kaliforniya Universitetinin alimləri üzə çıxarıblar ki, sevdiyin insanlar barədə düşünmək də ağrıları tez unutdurur və onların azalmasına səbəb olur. "Tze Dailu Teleqraph"ın məlumatına görə, həmin təcrübə zamanı könüllü təcrübəyə qatılan qadınlar əvvəlcə ağrı verən bir əşyanı ələ götürüblər. Bunun ardınca isə sevdikləri kişilərin, daha sonra isə yad insanların əllərini öz əlləri ilə birləşdiriblər. Sevdikləri insanların əllərinə toxunduqda hiss etdikləri ağrı getdikcə azalmağa başlayıb.