Fiziki hərəkətlərin insan sağlamlığına xeyirli olduğu çoxdan məlumdur. Lakin son araşdırmalar zamanı məlum olub ki, idmanla məşğul olmaq depressiyaya qarşı ən yaxşı vasitədir. Amerikalı alimlərin bununla bağlı apardıqları son araşdırmaların nəticələri "Taym" jurnalında nəşr edilib. Amerikalı alimlər hələ 1980-ci illərdən müşahidə ediblər ki, daim fiziki hərəkətlər edən insanlar digərləri ilə müqayisədə depressiyaya az düşürlər. 1999-cu ildə Amerikanın Dyuk Universiteti tərəfindən aparılan araşdırmalar zamanı isə üzə çıxıb ki, aerobika ilə məşğul olanlar depressiyaya düşən zaman tibbi müalicə alanlarla müqayisədə ondan daha tez canlarını qurtara bilərlər. Həmçinin idmanla məşğul olan xəstələrdə sonradan depressiya əlamətləri də müşahidə olunmayıb. Professor Filp Holmsun başçılıq etdiyi alimlər qrupunun apardıqları son araşdırmalar zamanı isə müəyyənləşib ki, bir neçə həftə fiziki hərəkətlər edən insanların beynində qalaninin miqdarı artır. Məhz bu maddə depressiyanın yaranmasına səbəb olan hormonların fəaliyyətini tənzimləyir.