İnsanların psixoloji durumu ilə bağlı daha bir maraqlı təcrübə aparılıb. Çoxu hesab edir ki, sevimli insanından ayrılmış qadının depressiya yaşadığı, həyatının ən çətin vəziyyəti ilə üzləşdiyini düşünərək əzab çəkdiyi vaxtda ondan ayrılmış kişi "azadlığı" bayram edir. Amerika mətbuatının yazdığına görə, yerli alimlərin araşdırması fərqli nəticəni üzə çıxarıb. Məlum olub ki, boşanma kişilərə nəinki qadınlar qədər, hətta daha çox təsir göstərir. Alimlərin qənaətinə görə, kişilər hisslərini büruzə vermir və söhbət romantik münasibətlərdən gedən zaman onlar emosional cəhətdən zərif cinsin nümayəndələrindən daha kövrək olur. Bunun səbəblərindən biri də odur ki qadınlar ailə və ya rəfiqələri ilə bütün problemlərini bölüşürsə, kişilərdə intim münasibətləri haqda kiminləsə "dərdləşmək" ənənəvi hal deyil.